तरुण तेजांकितांचा शोध सुरू

मुंबई : करोना काळात औषधनिर्मितीमधील संशोधनापासून ते करोनाबाधितांना रुग्णालयात खाटा मिळवून देण्यासाठीची व्यवस्था उभारण्यापर्यंत विविध क्षेत्रात तरुण-तरुणी जोमाने कार्यरत होते. नागरिकांच्या दु:खाचे ओझे दूर करण्यासाठी स्वप्रेरणेने युवकताफा राबत होता. भवतालातील या कार्र्यरतांच्या पाठीवर कौतूकाची थाप देणाऱ्या ‘लोकसत्ता तरुण तेजांकित’ पुरस्कारांच्या चौथ्या पर्वासाठी नोंदणी प्रक्रिया सुरू झाली आहे.

गगनालाही गवसणी घालण्याची महत्वाकांक्षा बाळगून जिद्दीने, सातत्याने नवनवीन कल्पना – तंत्रज्ञान – संशोधनाच्या आधारे विविध क्षेत्रात कर्तृत्वाचे नवे क्षितिज गाठणाऱ्या तरुण-तरुणींचा शोध ‘लोकसत्ता तरुण तेजांकित’ उपक्रमातून घेण्यात येतो. ‘भविष्यानेही आशेने पहावे, अशा वर्तमानाचा गौरव’ या घोषवाक्यासह सुरू झालेल्या ‘लोकसत्ता तरुण तेजांकित’ पुरस्कारांचे हे चौथे वर्ष आहे. करोनामुळे तिसऱ्या वर्षीचा पुरस्कार सोहळा लांबला होता, यावर्षी मार्च महिन्यात हा सोहळा पार पडला. गेल्या तीन वर्षात विविध क्षेत्रातील ४६ कर्तृत्ववान तरुण तेजांकितांचा सन्मान या पुरस्कारांच्या माध्यमातून ‘लोकसत्ता’ने केला आहे.  विज्ञान, तंत्रज्ञान, सामाजिक कार्य, क्रीडा, साहित्य, कला, मनोरंजन, कायदा, धोरणे, राजकारण, प्रशासन, क्रीडा, उद्योग आणि व्यवसाय अशा विविध क्षेत्रात कर्तृत्वाची नवी क्षितिजे गाठणाऱ्या तरुणाईला ‘लोकसत्ता तरुण तेजांकित’ पुरस्काराने सन्मानित करण्यात येते.

प्रायोजक

देशाचे भविष्य घडवू पाहणाऱ्या वर्तमानातील तरुण शिलेदारांचा सन्मान करणाऱ्या या पुरस्कारांसाठी महाराष्ट्र औद्योगिक विकास महामंडळ (एमआयडीसी) हे मुख्य प्रायोजक लाभले आहेत. तर सारस्वत को-ऑपरेटिव्ह बँक लिमिटेड आणि महाराष्ट्र प्रदूषण नियंत्रण मंडळ हे या पुरस्कारांसाठी सहप्रायोजक आहेत.

प्रवेशिका ऑनलाइन…

यंदाच्या ‘लोकसत्ता तरुण तेजांकित’ पुरस्कारांचे बिगूल वाजले असून त्यासाठी नोंदणी प्रक्रियाही सुरू झाली आहे. नोंदणीसाठी प्रवेशपत्रिका ऑनलाइन भरणे अनिवार्य आहे. विज्ञान, तंत्रज्ञान, सामाजिक कार्य, क्रीडा, साहित्य, कला इत्यादी क्षेत्रांमध्ये आपल्या कर्तृत्वाची जोड देत भरीव कार्य उभारणाऱ्या तरुणाईचा शोध घेण्यासाठी  ‘लोकसत्ता तरुण तेजांकित’ पुरस्कारांचा हा मंच  सज्ज झाला आहे.

प्रवेशअर्ज कसा भराल?

या पर्वाच्या निवड प्रक्रियेचे तपशील https:// taruntejankit. loksatta .com/  येथे पाहायला मिळतील. ती प्रवेश पत्रिका ऑनलाइन भरून पाठवणे अनिवार्य आहे. त्याचबरोबर आपल्या भवताली दिसणाऱ्या गुणवंत तरुणांची नावे माहितीसह सुचवताही येणार आहेत.

The post तरुण तेजांकितांचा शोध सुरू appeared first on Loksatta.

from मुंबई – Loksatta https://ift.tt/3FcdZeB
via